Ang masako nga dalanon sadto sang Barangay Roberto S Benedicto sa La Carlota City ang sa karon natabunan sang mga puno sang kahoy, duta, salakyan, tricycle, motorsiklo pati na ambulansya.
Sa gwa sang barangay naghal-id bisan diin lang ang mga salakyan.
Ang mga balay napuno sang lunang.
Kinahanglan mo taklason ang mga kahoy, lunang kag mga pagkabutang nga na anod sang baha para makalabay sa dalan.
Ang ambulansya nga kuntani maga rescue sa mga PWD kag senior citizens na trap sa baha gani ang mga sakay sini gin rescue na lang.
Suno kay Punong Barangay Socrates Martin Guba, pensar anay nila natapos na ang bagyo matapos ang mabaskog nga hangin. Wala sila magdahum nga gulpi lang magbulyada ang mabaskog nga baha nga may upod nga mga kahoy kay nag awas ang tubig sa suba.
Ang eskwelahan nga amo kuntani ang evacuation center, ginsulod sang tubig gani sa atop na nag tinir ang evacuees imbes sa classrooms.
Bilog nga barangay apektado gani tanan gin-evacuate.
May apat nga nasapwan nga bangkay sa barangay wala pa ma kumpirma sang barangay kun pila ang missing tubtob sa karon.
Ang taytay nga naga angut sang ila barangay sa Barangayu DSB sa Pontevedra narusdak.
Naga apela ang punong barangay sang bulig labi na pagkaon kag ilimnon nga tubig bangud sang ila sitwasyon.