Gindagdagan na sang notice sang Bacolod City Legal Office si Barangay 16 Punong Barangay Jason Ligaya may angut sa mga nagbinalik nga mga illegal structures sa kilid sang dalan sa Palanca Road nga iya nasakupan.
Ginsiling ni Atty. Joseph Karol Chiu, City Legal Officer, nga gin-clear na nila ang lugar sang July 9 sang tinalikdan nga tuig, apang sang ginbalikan ini sang CLO agud i-inspect, natukiban nga may mga bag-o naman nga mga illegal structures ang nakatukod.
May mga negosyo sang car wash kag may mga bulkitan na sa higad sang dalan. May ara man trucks sang junkshop kag mga panimalay.
Ini ang ginadumilian sang siudad bangud sa mando sang Department of Interior and Local Government nga ipabilin nga hilway para sa publiko ang mga sidewalks.
Sang Lunes, ginkadtuan na sang CLO si Kapitan Ligaya, agud hatagan sang notice kag hatagan siya sang oras nga mapahalin ang amo nga mga istruktura.
Kon indi pa mapakakas sang punong barangay ang amo nga mga istruktura, posible nga pasakaan siya sang siudad sang kaso administratibo base sa Local Government Code.
Sandig man sa amo nga direktiba sang DILG, responsibilidad na sang punong barangay nga ipabilin nga hilway ang dalanon matapos in inga mahawanan sang siudad.
Sa karon, wala pa makasabat si Kapitan Ligaya sa notice gikan sa siudad. Gintinguhaan man sang Digicast Negros nga makakuha sang pahayag, apang wala ini sa barangay hall sang aga.
Si Ligaya ang una nga punong barangay sa siudad nga ginserbehan sang amo nga notice.
[sibwp_form id=1]