Kun may makit-an nga rashes sa lawas, kag nagalain ang pamatyag kaangay sang daw naga trangkaso indi pag ibalewala ini. Mas maayo na lamang nga mag pakonsulta.
Ini ang panugyan ni Governor Eugenio Jose Lacson nga nag kumpirma nga wala sang kaso sang Mpox sa Negros Occidental.
Damlag pa nag pa gwa na sang advisory ang Provincial Health Office tuhoy sa Mpox kag paano malikawan ini.
May kumpirmado na nga mga kaso sang mpox sa kaiping nga probinsya sang Iloilo kasubong man sa Iloilo City. Wala sang pagbag-o sa mga protocol sa borders suno kay Lacson.
Dapat lang nga dumdumon sang pumuluyo nga mag patuman sang nagakaigo nga tikang para mapangapinan man ang kaugalingon.
Ehemplo diri suno kay Lacson nga kun mag padulong sa mga crowded nga lugar nagakabagay lamang nga mag gamit sang face mask.
Ang Mpox tuga sang virus. Ini makuha paagi sa skin to skin, mouth to mouth, mouth to skin contact, close contact sa naga masakit sang Mpox, sa mga tela ukon mga kagamitan nga na contaminate gikan sa naga masakit sang mpox, kag paagi man sa laway, sip-on ukon plemas.