Banwa sang Pulupandan ang isa sa anum ka mga lugar sa Western Visayas nga na upgrade gikan sa red zone padulong sa pink zone sandig sa ASF Zoning Status.
Paathag ni Dr Placeda Lemana, ang provincial veterinarian, nagakasayuran nga ang Pulupandan ang tigayon nga naka comply sa mga requirement nga nagalakip sang pag submit sang regular nga blood samples kag negative na ang resulta sini sa ASF virus, kag wala na sang may na record pa nga ASF case humalin sang nag-report sang ASF sa lugar. Ang Pulupandan ang una nga banwa sa probinsya nga naka record sang ASF case.
Nagapabilin sa gihapon sa red zone ukon infected area ang Escalante City , Hinigaran, Kabankalan City, La Castellana, San Carlos City, Silay, Valladolid kag Victorias City.
Ang mga lugar sa palibot sang mga infected areas ang yara sa pink zone ukon buffer zone.
“Nag pink na ang Pulupandan kay before red na sila kay sila na ang first case naton sa Negros Occidental. Ang buffer zone which is the pink amo na siya ang areas which is in close proximity to the affected zone, amo na nga halos tanan nga banwa pink kay man lapit sila sa red zone”, suno kay Lemana.
Ang yellow zone naman suno kay Lemana nagakasayuran nga highly populated area pero wala sang may na record sang kaso sang ASF rason nga sila ang gina paidalom sa surveillance. Nalakip diri ang Candoni, Cauayan, Himamaylan, Hinob-an kag San Enrique. Ang Sipalay ang naga isahanon nga yara sa light green zone ukon protected area.
“Ang yellow naman amo na siya ang surveillance zone buot silingon highly populated area but with no cases of ASF pero under sa close monitoring. Ang light green amo na siya ang protected zone”, suno kay Lemana.
Sa report sang National ASF Prevention and Control Program page, 408 tanan ka areas sa pungsod ang gin-upgrade sa pink zone gikan sa red kag 72 naman ang na upgrade sa yellow zone ukon surveillance gikan sa pink zone.