Pilason ang katapo sang Kabankalan City PNP matapos matiruhan sa gina patigayon nga buy-bust operation.
Nasamaran si Police Staff Sergeant Iric Montoyo sang matiruhan samtang naga patigayon sang buy-bust operation sa Sitio Magkinigkig, Brgy. Tan-awan sa Kabankalan City kahapon sang aga.
Nadakop naman sang mga pulis ang gina alegar isa ka criminal gang member kag number 6 nga drug priority target list nga si Alvie Taco pati na ang isa ka street level individual nga si Joseph Sapu-an.
Nahibaluan sang isa sa sa mga suspek nga pulis ang ila nga ka transaksyon kag gilayon nga nagluntad ang tiruhay. Gintiro ni Taco ang pulis kag naigo ini sa natuo nga kamot.
Nakuha sa ila ang 18 tanan ka mga heat sealed plastic sachet nga may suspected shabu kag duha ka mga pusil.
Nagabug-at ang suspected shabu nga nakuha sa mga suspek sang 20 gramos nga nagabalor sang 136,000 pesos.
Detained ang duha ka mga suspek nga magapangatubang sang kaso nga paglapas sa Comprehensive Dangerous Drugs Act of 2002 samtang magapangatubang man sang dugang nga kaso si Taco nga frustrated homicide.