Gindala sa Bacolod Adventist Medical Center ang isa ka pulis matapos madalasa sang pickup van samtang siya ang nagadumala sang lakat sang trapiko sa Alijis Road, sakup sang Barangay Singcang-Airport sa Bacolod City, sadtong Sabado sang gab-i.
Antes sa pagkabunggo sa pulis, may nagluntad nga vehicular incident kun diin imbulbado ang isa ka tricycle.
Nagbulig sa pagdumala sang traffic flow sang pulis nga si alyas “Mark” nga isa ka Corporal kag residente sang Pontevedra, Negros Occidental.
Apang siya ang nadalasa sang pickup nga ginamaneho ni alyas “Gioliven”.
Naggwa sa imbestigasyon nga wala makita sang driver sang pickup ang pulis bangud dulom kag naga-ulan sadto nga tion.
Sa pagpang-usisa sang traffic investigator, nahibaluan nga expired ang driver’s license sang pickup driver, nga gindala sa custodial facility sang Police Station 8.
Base sa pinakaulihi nga update, nakagwa na sa ospital ang pulis, nga na-assign sa Regional Police Strategy Management Division sang Police Regional Office-Negros Island Region.*