Nagluntad ang una nga insidente sang pagpaniro pasado las 7 sang aga sang Domingo sa Sitio Tagda, Barangay Dolis sa Calatrava kun diin gintiro ang 58-anyos nga lalaki sa gwa sang iya balay, nga nagahimos kuntani agud nga mag simba.
Anum ka mga lalaki nga may mga armas ang nagtiro sa ulo sang biktima kag nagpalagyo.
Pagkaligad sang tatlo ka oras, nag engkwentrohanay ang mga katapo sang 1st Negros Occidental Provincial Mobile Force Company kag ang mga armado nga lalaki samtang nagaserbe ang mga kapulisan sang warrant of arrest sa Brgy. Menchaca.
Bangud sang pagnilukpanay na-missing si Police Senior Master Sergeant Rommel Aguilar sang 3rd Maneuver Platoon sang 1st NOCPMFC.
Nakabaton sang report ang Calatrava PNP nga may bangkay nga nasapwan sa Purok 5, Brgy. Laga-an kag siya ang positibo nga ginkilala nga amo ang nadula nga pulis.
Sa report sang PNP nagpangayo sang bulig ang pulis sa mga pumuluyo sang siya sang ginpalapitan sang anum ka mga armado kag gintiro.
Daku ang pagpati sang PNP nga pareho lang ang mga suspek nga imbulbado sa duha ka shooting incident.
Gin-ako sang New People’s Army ang pagpatay sa 58-anyos nga si alias Mando sa Brgy. Dolis tungod ila gin-alegar nga isa siya ka aktibo nga ispiya sang militar.
Suno sa NPA, nakuha nila sa iya ang isa ka caliber .45 nga pistola kag mga bala.
Dugang pa sang NPA nga ila naka-engkwento ang mga kapulisan. Nakuha sang NPA kay Aguilar ang iya 9mm pistol nga service firearm kag pila ka mga bala.
Gin-kondinar sang regional office sang PNP ang pagpamatay sang armado nga grupo sa Calatrava kag padayon ang operation agud madakpan ang mga suspek kag mahatagan sang hustiya ang napatay nga pulis.*