Sa Hunyo 28, ginapaabot ang pag bukas sang Manapla Port Stevedoring and Arrastre ukon MPSA sa Barangay Punta Salong sa Banwa sang Manapla.
Apat ka biyahe sa kada adlaw padulong sa Ajuy sa Iloilo kag pabalik ang gina tanyag sini.
Gina abi-abi mismo ni Mayor Manuel Escalante, III ang pag operate sang puerto.
Wala labot sa income nga makuha sang banwa paagi sa buwis, may dugang nga mga palangabuhian ang ginapaabot sang mga pumuluyo sang banwa.
Suno kay Mayor Escalante, may mga 10 million pesos nga tax ang sarang nga ma income sang banwa sa kada tuig.
Mga association naman sang mga farmers kag farm workers, lakip na kooperatiba sang mga manunudlo kag grupo sang mga fisherfolks ang gina paabot nga maga operate sang canteen kag iban nga kalan-an kasubong man sang talipapa kag driver’s lodge.
Ang ini nga mga facilities ang iga patukod man sa tuyo nga masabat ang kinahanglanon sang mga pasahero kag iban pa nga kliyente nga maga avail sang services sang puerto.
Suno kay Dave Sarrosa isa sa mga board member sang MPSA iga announce nila ang fare ukon ang sukot sa pamasahe. Ini ang mas barato kun ipaanggid sa iban. Gikan sa Bacolod via sa Circumferential Road padulong Banago, 39 kilometers ang kalayuon sa Manapla Port. Kun gikan naman sa Escalante Port, 59.2 kilometers ang kalayuon sa Manapla Port.