Public hearing angut sa Negros Occidental Bulk Water Project ang ginpatigayon sini lamang.
Sa covered court sang Barangay Guimbalaon sa Silay City ginpatigayon sadtong Disyembre 3 ang public hearing nga gin tambungan sang masobra sa isa ka gatos ka mga participants nga nagalakip sang mga mangunguma, mga pumuluyo, environmental advocates, local leaders kag iban pa, sandig sa post sang Negros Occidental LGU.
Mismo ang committee on Environment and Natural Resources kag Committee on Utilities sang Silay City Council ang nag convene sang public hearing kun sa diin ginpatigayon ang presentation kag ginhaboy ang mga pamangkot.
Pila sa mga gintalakay amo ang water security, watershed rehabilitation, environmental concerns kag long-term sustainability sang supply sang tubig sang Silay.
Suno sa probinsya may patigayunon nga ocular inspection sa intake site kag sa Hinalinan River sa Guimbalaon.
Suno kay Councilor Mike Maravilla nga chairperson sang Committee on Utilities may duha pa gid kag public hearing nga patigayunon.
“Damo pa nga public hearing. Also we don’t want to short cut the process para makuha ta ang true sentiment sang tawo”, suno kay Maravilla.
Pero sa una nga public hearing, ang sentimiento sang mga nagtambong negatibo para sa bulk water project.
Wala labot diri may mga position paper nga gin-submit ang pila ka mga farmer groups nga naga pakita sang ila nga panindugan kontra sa bulk water project.
Sa post sang probinsya gin patpat nila ang sabat sa mga pamangkot sa amo nga public hearing.
Pero, suno kay Maravilla ayhan nasabat man, pero, isa sa lantawon kun bala tigayon nila na kumbinsi ang mga natungdan.
“Answering is different from convincing. May concerns ang mga residents, even though nasabat, it doesn’t mean napa huo nila ang mga tawo. Lain man ya kun nasabat mo convincingly kag na sway mo ang iya perception kag nasabat mo sya nga wala mo napa bilib ang tawo”, suno kay Maravilla.
Gina sulit sang probinsya nga ang Bulk Water Project indi lamang isa ka infrastructure undertaking, kundi isa ka flagship initiative sang gobernador sa pag pasiguro nga maka angkon sang safe, clean kag sustainable water sang mga Negrense.*