Nagsaka sa lima ka pesos ang kada kilo sang manok sa merkado. Masobra naman sa uno singkwenta ang ginsaka sa kada kilo sang baboy.
Base sa January 3 nga monitoring sang Provincial Veterinary Office, 186.88 pesos ang average nga presyo sang manok kag 233.07 pesos naman ang sa baboy.
Sa report ni Dr Renante Decena, ang provincial veterinarian, ang siudad sang San Carlos ang na monitor nga may pinaka daku nga saka sa broiler.
250 pesos ang kilo sang broiler sa siudad. Bahin naman sa presyo sang baboy ang siudad sa gihapon sang San Carlos kag banwa sang Cauayan ang may pinaka mataas presyo – 270 pesos ang kilo.
Paathag ni Decena ang saka sa presyo tuga sang holiday season kasubong man sa shortage sang manok bangud sang pag-igo sang bagyo. Balantayan kun tayuyon ang pagsaka sang presyo sang manok.
Suno kay Decena nagnubo naman ang demand kay natapos na ang holidays pero ang pila ka mga inputs kasubong sang feeds kag mga bulong ang ginapaabot magasaka bangud man sang pagsaka sang presyo sang petrolyo lakip man ang epekto sang kahalitan sang bagyo.
Samtang padayon naman ang pag supply sang probinsya sang baboy sa Luzon.