Mga progresibo nga grubo sa Bacolod ang nag martsa kadungan sa State of the Nation Address ni Presidente Ferdinate Marcos, Jr.
Indi pasado ukon failure para sa Bayan Negros si Presidente Marcos, Jr sa iya sini nga performance.
Wala naman sila sang may gin hatag nga rating kay vice president Sara Duterte bangud wala man ini nag perform.
Sa kilid sang Provincial Capitol Lagoon nag sugod sang ila nga aksyon protesta ang Bayan Negros.
Bitbit nila ang mga tarpaulin nga naga panawagan nga dapat sukton si Marcos kag si Duterte naman ang dapat nga maga panabat.
Sila ang nag martsa sa mayor nga dalanon sang Bacolod.
Suno kay Noly Rosales ang spokesperson sang Bayan Negros, nasiling ni Presidente Donald Trump sang Amerika nga si Marcos ang best negotiator, ini bangud nga naka kuha si Marcos sang 1 percent nga ayo sa tariff pero ang pungsod Amerika ang nangin hilway naman sa tariff sa mga produkto nila nga magasulod sa pungsod.
Ang rating nga ginhatag nila kay PBBM, 2 over 10. Apesar sang tuman nga gasto para kuntani sa flood control wala man gani sang may nabuhat sa problema sa baha.
Lakip na diri ang kapaslawan sa saka sang sweldo sang mga mamumugon. Si VP Sara suno sa ila ang dapat Ipa-idalom sa trial. Siya ang manabat sa gina alegar iya nga ginkuha nga people’s money.
Samtang, kaina sang aga nag patigayon man sang aksyon protesta sa mga mayor nga dalanon sang Bacolod ang Sanlakas Negros kag Bukluran ng Manggagawang Pilipino kag mga ka alyado nga organisasyon sini.
Panawagan nila PBBM sukton kag si Sara naman litison.
Sang hapon, grupo sang Sentrong Alyansa ng mga mamamayan o Sambayanan Negros ang nag patigayon sang peace rally. Sila ang gina kabig pro government group.
Sa replica sang NGC sa Plaza sila nagtipon kun sa diin ila gina panawagan ang pag pasabat sang teroristang NPA sa mga human rights violation nga ila nabuhat.
