Halos nagserbe na nga paliliguan sang kabataan ang naga-leak nga linya sang Baciwa-Primewater nga yara sa kalog sa Barangay Villamonte tuga sang kakulang sang water supply sang nagligad nga bulan.
Pero makaligad nga nangin operational na ang water supply project sa Bocal-bocal spring sa Barangay Alangilan tigayon nga nasolusyunan ang problema sa 11 ka mga areas nga halos wala na sang water supply nga nagalab-ot sa mga pamalay. Nalakip na diri ang Barangay Villamonte.
Ginsiling ni Mayor Albee Benitez nga amat amat na nga na-restore sang water utility ang kinahanglan nga water supply sa siudad halin sa 70 MLD ukon million liters a day nga nagsarurot sa 67 MLD sang tig-ilinit.
Ginapaabot sang alkalde nga malab-ot sang Baciwa-Primewater ang target nga 80MLD sa madasun nga semana.
Gindugang niya nga dapat makaayo sang water utility ang mga naga-leak nga linya kag pipeline sini para mapasiguro nga magtayuyon ang water supply sa mga lugar sa masami ginakulang sang tubig.