Ang probinsya sang Negros Occidental ang naga panawagan nga padayunon kag pabaskugon ang search and rescue operations para sa mga missing nga seafarers sa naglugdang nga barko malapit sa Scarborough Shoal kun sa diin may duha ka mga Negrense ang nalakip sa missing.
Sa pahayag nga gin pa gwa sang Negros Occidental sa page sini gina panawagan ni Governor Eugenio Jose Lacson ang nagakaigo nga ahensya sang gobyerno kasubong man sa maritime stakeholders nga padayunon ang pag pangita.
Naka saad nga ang probinsya naga isa kag naga unong sa pamilya nanday Captain Elimar Jucal sang San Enrique kag Jejanfer Partosa Marfa sang Cadiz City, kasubong man sa mga pamilya sang iban pa gid nga crew members sang M/V Devon Bay nga padayon missing matapos malunod ini sang Enero 23.
Sa 21 ka crew members, 15 ang na-rescue, duha ang kumpirmado nga napatay kag apat nga gina lakipan nanday Captain Jucal kag Marfa ang missing.
Suno sa probinsya ang ginpakita nga kaisog kag selfless leadership ni Jucal sa pag pasiguro sang safety sang iya nga crew ang naga pakita sang ideals sang mga Filipino seafarers kag nagakaigo nga hatagan sang pagkilala.
Ang M/V Devon Bay ang all-Filipino–crew. Nalugdang ini sa West Philippine Sea, mga 55 nautical miles northwest sang Scarborough Shoal.
Sa pihak nga bahin ginkumpirma man ni 6th District Representative Mercedes Alvarez nga duha sa mga na-rescue nga crew ang gikan sa 6th District.
Ang pamilya sang isa ang naka padulong na sa Manila matapos nga makumpirma man nga naluwas ang ila nga himata.
Ang pamilya sang isa, natalana pa nga magpadulong sa Manila.
Ang talatapan ni Alvarez ang naghatag sang assistance paagi sa pagbayad sang ila nga pamasahe. Naga pakig-angut man personal si Alvarez sa talatapan sang Department of Migrant Workers para sa mga apektado.
“On my part nag reach out kita with Philippine Coast Guard and Department of Migrant Workers, specifically kay Sec Cacdac kag na confirm man nila nga inang duha halin sa district na-rescue man gid siya. As to the assistance I believe nga ang tag-iya sang barko may ara gid na ya assistance for them. In the same way nga ang DMW may ara man inughatag nga assistance sa ila. I think kahapon they also arranged nga kahapon sang aga amo to nga naka abot sila sa Manila Harbor. On my part nagbulig kita sang plete”, suno kay Rep Alvarez.*