Nagpasalig ang Police Regional Office-Negros Island Region sa nga nagadihon na sila sang mga tikang agud mapasiguro nga hilway ang publiko kag madakpan gilayon ang mga suspetsado sa nagluntad nga tiniruhay sa siyudad sang Silay.
Magatukod ang PRO-NIR sang isa ka Provincial-Level Special Investigation Task Group.
Suno kay Police Lt. Col. Joem Malong, Public Information Officer sang Regional Election Monitoring and Action Center ukon REMAC, nagpagwa na sang “Be On The Look Out” nga mandu ang Negros Occidental Police Provincial Office sa tanan nga mga kapulisan.
Nagpangabay naman si Regional Director Police Brigadier General Arnold Thomas Ibay sa publiko, nga magpabilin nga kalmado, magkooperar sa utoridad kag mag-report sang ano man nga impormasyon nga makabulig sa pagdakup sa mga suspek.
Iya man ginkundinar ang nagluntad nga kinagamo. Nagresulta sa pagka-utas sang kabuhi sang duha ka mga persona kag pagkasamad sang pito ka iban pa.