Mga 30 ka mga estudyante sang Leshem Christian School sa Bacolod City ang indi makapadayon sa masunod nga grade level bangud natukiban nga wala sang permit to operate ang eskwelahan.
May mga grade 6 students sa amo nga eskwelahan nga ma-graduate na kuntani, apang bangud sa kakulang sang dokumento sang eskwelahan, indi sila anay maka-enroll sa high school.
Ginsiling ni Bacolod City School Division Office Superintendent Dennis Develos nga ginduso na nila sa regional office ang pagpasara sang nasambit nga pribado nga elementary school.
Natukiban sang Department of Education nga wala sang permit ang eskwelahan matapos sila nga nagapatigayon sang inspection.
May apat ka branches ang eskwelahan nga nahamtang sa Barangay Alijis, Vista Alegre, Mansilingan kag Cabug kag tanan ini wala sang permit to operate.
Dugang ni Develos, nakig-angut na sila sa mga ginikanan sang estudyante kag ila na ginplastar ang mga pamaagi agud makapadayon sa masunod nga grade levels ang mga estudyante.
Ginahulat nalang sang SDO Bacolod ang Cease and Desist Order gikan sa regional office agud tigayon na nga mapasara ang nasambit nga eskwelahan.
Sarang nga mapasakaan sang mga ginikinana sang kaso ang tagdumalahan sang Leshem Christian School.*
[sibwp_form id=1]