Sa isa ka supermarket may abiso nga sa tagsa ka customer sarang lamang makabakal sang duha ka whole dressed chicken. Ang mga cut ups naman duha ka kilo ang maximum nga mabakal.
Sa Burgos Public Market ang mga manugbalik, naga muno man sang kakulang sang supply.
Suno sa manugbaligya nga si Jereme Bagioso ini gani ang rason ngaa nagsaka ang presyo sang kilo sang manok. Sa ila baligyaan 180 pesos ang kilo sang whole dressed chicken. Bangud sa kamahal suno sa iya, may mga naga bakal nga sadto anay isa ka kilo, karon tunga na lang sa kilo.
Sa Feb. 1 nga monitoring sang Provincial Veterinary Office bente uno pesos ang average nga ginsaka sang broiler nga manok sa mga merkado kun ipaanggid sa jan 25 sini nga monitoring. 180.62 ang average nga kilo sang manok karon sa merkado.
Paathag ni Dr Renante Decena, ang mga integrators ang nag downsize tuga sang oversupply sang 2020 sa manok dala sang COVID-19.
Suno kay Decena, naglab-ot sa 70 percent ang oversuppply sadto. Kay wala man sang storage capacity ang probinsya may mga ginpadala sa Mindanao.
Rason nga sa forecast nag reduce sang 50 porsiento sa production sang manok.
Sadto anay naga produce sang isa million nga dressed chicken kag isa ka million man sa live chicken sa kadabulan.
Karon singkwento porsiento na lamang sini ang gina produce.
Sini nga Enero nagsugod batyag sa kakulang sang supply.
60,000 heads per day ang gina konsumo nga manok sang probinsya ilakip na ang Bacolod. Naga lab ot ini sa 70,000 kun may okasyon.
May native chicken man nga available suno kay Decena bilang alternatibo pero mas mahal ini sang sa broiler.
Indi lamang presyo sang manok ang nagsaka. Mahal man ang baboy sa karon sa probinsya.