May pag nubo gid man sa karon sa presyo sang live weight sang baboy.
Ini suno kay Ric Lauron ang presidente sang Alliance of Hog Raisers Assocation of Negros Occidental. Depende sa area kag depende man sa ginakasugtan, ang presyohanay sang live weight sang baboy yara sa 150 tubtob 160 pesos ang kilo.
Sang nagliligad nga bulan suno kay Lauron wala naga nubo sa 160 pesos ang baklanay sa live weight.
Ang pag barato suno sa iya mahimo man dala sang sitwasyon sang ekonomiya humalin sang bulan sang Agosto.
Sa 150-160 pesos kada kilo, igo lang nga maka bawi-bawi sila sa ila nga gin gasto suno kay Lauron.
May pag nubo man sa baklanay sang baboy sa merkado.
Sa Himamaylan City suno sa iya, yara sa 300 to 330 ang kilo sang baboy sa merkado. Sa pipila ka merkado sa iban nga banwa kag siudad may yara sang naga baligya sang 280 pesos tubtob 300 pesos ang kilo sang baboy.
Pag abot sang holidays naga salig sila nga maga balik saka ang presyo. May naga kaigo man nga supply sa karon sa probinsya.
“Daw patas-patas lang kita tungod sa kamahal sang aton inputs. Gina tan-aw man naton in the coming months since November kita pa December basi mag balik naman taas-taas ang presyo naton sang sa live sa subong”, suno kay Lauron.