Presyo sang karne sang baka, carabao kag manok ang may pagsaka sandig sa weekly monitoring sang Provincial Veterinary Office.
Sa June 2 nga report sang Provincial Veterinary Office, saka sa average price sa kada kilo sang karne sang baka ang yara sa piso kag 39 sentimos kun ipaanggid sa presyo sang nagligad nga semana.
Ang sa carabeef naman yara sa 67 centavos sa kada kilo ang saka kag sa manok 42 centavos kada kilo ang saka.
Ang Escalante kag Kabankalan ang may yara sang pinaka mahal nga presyo sang carabeef P450 pesos ang kilo.
Sila man sa gihapon ang may pinaka mahal nga presyo sa karne sang baka, P450 ang kilo.
Ang Victorias, Silay kag Hinoba-an ang may pinaka mahal nga presyo sa manok, P240 pesos ang kilo.
Halos wala naman sang pagbag-o sa presyo sang baboy. Ang average nga presyo sini yara sa 368 pesos ang kilo.
Ginapaabot ang pag damo sang supply suno kay Dr Yasmin Tan sang PVO bangud gina paabot ang pagsugod sagod sang baboy, karon nga wala na sang red zone sa African Swine Fever Zoning sa Negros Occidental.
“Medyo nagdamo na subong liwat ga raise sang baboy. May iban nga nag start na liwat tapos nag pink na ang province”, suno kay Tan.