Presidente sang Central Philippine State University ang naga laum nga sa gihapon ma resolve ang isyu sa duta sa CPSU – Moises Padilla Campus karon nga nag withdraw na ang probinsya sa tuyo nga pagbakal sini.
Sa interview sang Digicast Negros kay Aladino Moraca, ang CPSU President, may kabudlayan man sila sa karon sa sitwasyon pero tuyo nila nga mag pabilin ang eskwelahan sa area.
Paathag niya, ang 2 hectares nga napaidalom sa Deed of Usufruct nga nag-expire na kag amo ang gina bawi sang pamilya Nazareno ang gina tindugan sang ila nga administrative building, covered court kag iban nga classrooms kag library.
Pero may 2.3 hectares pa man nga gina tindugan ang eskwelahan nga wala sang problema kag diri na lamang sila maga tutok sang ila nga investment.
Padayon ang klase sa karon kag suno sa iya, kaina, Lunes, nakig sapul man siya sa mga ginikanan sang mga estudyante kag siya ang nag hatag sang commitment sa ila nga magapadayon ang eskwelahan para makampante man ang mga estudyante kag ginikanan.
May 920 nga nag enroll karon nga school year suno sa iya sa idalom sang information technology, agribusiness kag educational programs sang eskwelahan.
Mga 80 por siento sang mga estudyante mga taga Moises Padilla, ang nabilin gikan na sa kaiping nga mga banwa.
Nagahulat naman lamang sila suno sa iya sa kun ano ang dangatan sang sitwasyon sa duta pero naga laum si Moraca nga mabuligan sa gihapon sang LGU ukon sang probinsya ang sitwasyon.
“Actually kami sa administration karon, nagapalibog kun ano ang himuon namon. Pero ako nagapati ko nga basi ma istoryahan pa man na kag ma resolve. Didto ko halin nagstorya ko to sa mga parents kag mga estudyante, nag commit na ko to nga indi kamo mag kabalaka mag pabalin na di ang university”, suno Moraca.
Nag withdraw ang probinsya sa tuyo nga pag bakal sang duta sa balor nga 25 milyones pesos matapos nga wala maka comply si Francisco Nazareno, Jr sang mga legal kag documentary requirements. Nangin uncooperative man si Nazareno.