Gobernador kag provincial administrator sang Negros Occidental ang ginreklamo sang Provincial Planing And Development Officer angut sa pagsupak sang Comelec ban sa pag transfer sang mga empleyado.
Governor Lacson nagpahayag nga legal ang ila nga tikang kag may exemption gikan sa Comelec.
April 5 nag file sang reklamo sa Commission on Elections si Ma Lina Sanogal batuk kay Governor Eugenio Jose Lacson kag Provincial Administrator Rayfrando Diaz sa gina alegar pagsupak sa Omnibus Election Code.
Sa complaint affidavit ni sanogal iya ginsiling nga Marso 15 sang gin papanaog ang order nga naga re-assign sa iya sa Office of the Governor para sa special administrative concerns.
Ginmando man ang pagbulos sa iya ni Anna Marie Lucasan.
Suno kay Sanogal wala sang may nalakip nga statement ukon attachment gikan sa Comelec ang amo nga order, nga naga pakita sang approval sang amo nga ahensya karon nga gina napatuman na ang banning bangud nga election period.
Gin gakibot naman ni Lacson ang amo nga lihok ni Sanogal. Wala pa man sila sang may nabaton nga kopya sang reklamo, pero iya ginpakita sa katapo sang media ang approval sa exemption nga ila ginhinyo gikan sa Comelec regional office nga ginlagdaan ni regional director Wilfred Jay Balisado.
Nabaton nila ang approval Abril 21, kag March 15 man nangin effective sandig sa ila nga ginhinyo.
Paathag ni Lacson, si Sanogal kag tatlo ka iban pa gikan sa ppdo ang nagpahibalo na kay Lacson sadtong Nobyembre 15, 2021 nga sila maga retire sini nga tuig.
Rason nga gin talakay ang transition nga matabo kabangdanan man sang pagpapanaog sang amo nga officer order nga naga mando sang transfer kag ini ang ginkasugtan man ni Sanogal.
Kun mag-abot na ang pormal nga reklamo suno kay Lacson, ang exemption nga ila nakuha amo ang ila nga ipakita.
Magapabilin naman si Sanogal sa iya pwesto sa karon.
May separado pa gid nga reklamo nga constructive dismissal nga gin-file si Sanogal batuk kay Lacson sa Civil Service Commission sadtong Abril 1.