May masobra kinse pesos ang per kilowatt hour nga ginabayaran sang mga kunsomidor sa Central Negros Electric Cooperative.
Pero indi malipod ang masami man nga brownout kag ang posible pagsaka pa sa bulanan nga balayran sa kuryente epekto sang pagsaka sang presyo sang produkto petrolyo.
Gani isa man ka Power Plan nga gina finalize na ni Mayor Albee Benitez ang iya igaduso kay Presidente Ferdinand Marcos Jr. sa tuyo nga mapanubo kag magtayuyon ang power supply sa Bacolod lakip na probinsya sang Negros Occidental.
Nagapati ang alkalde nga paagi sa joint venture sang Local government unit upod sa mga solar power plant kag biomass power plant sa probinsya sarang pa mapanubuan ang presyo sang kuryente sa tres pesos pasaka.
Ginsiling man ni Benitez nga bisan indi man madayon ang proposed 300 megawatt Liquified Natural Gas project sa San Carlos City indi man ini lubos maka apekto sa mga kunsomidor bangud sarang man maka import ang mga power distributor sang supply halin sa iban pa nga area.