Nagwa sa medical findings sang ospital nga positibo sa amoebiasis ang pila ka myembro sang pamilya sa Purok Roma, Barangay Singcang-Airport sa Bacolod City. Ini matapos nga gina-alegar na-poison sa pakinhason nga ila ginakaon.
Ginsiling ni Dr. Grace Tan, pamuno sang Environment and Sanitation Division sang City Health Office, indi pa mapat-ud kun kontaminado gid man ang pakinhason ukon ang tubig nga gina-inom sang pamilya.
Wala pa sang resulta ang laboratory test sa samples nga ginkuha sang CHO sa tubig nga gina-inom sang pamilya. Naghinyo naman ang CHO sa Bureau of Fisheries and Aquatic Resources nga ipaidalom man sa testing ang pakinhason sa baybay. Sa karon, ginadumilian anay sang barangay ang pumuluyo nga magpanginhas sa baybay samtang wala pa ang resulta sang testing.
Nagkuha naman sang rectal swab samples ang CHO sa mga biktima agud mahibaluan kun posible ini nga kaso sang cholera. Suno kay Tan, ini ang isa ka precautionary measure agud matumod kag matapna na ang posibli nga kaso sang cholera.
Matapos nagkaon sang pakinhason ang anom ka katapo sang pamilya, tatlo diri ang gindala sa ospital bangud naglain ang ila pamatyag. Sa karon, isa nalang sa ila ang nagapabilin sa ospital kag yara naman ini sa estable nga kondisyon.*
[sibwp_form id=1]