Sa tion nga makasaylo na ang mga tenants sang Manokan Country sa temporary facility sang SM Prime Holdings Incorporated ang paghikot naman sang salayluhan sang mga offices kag department sa Bays Center ang madasun nga hikuton sang City Engineer’s Office kag City Legal Office.
Dala na diri ang mga baligyaan sang bulak sa nasakpan sang Fr. Ferrero Street Ginsiling ni City Legal Officer Atty. Romeo Carlos Ting, Jr plano sang siudad nga i- reclassify ang porsyon sang dalan bilang commercial lot sa tuyo nga malakip ini sa joint development project upod sa SMPHI.
Ang konseho ang nag-concur sa hinyo ni Mayor Albee Benitez nga temporaryo pasirad-an ang Fr Ferrero Street agud mahandaan ang natalana nga demolisyon kag pag-construct sang bag-o nga Manokan.
Sa karon nagapadayon man ang clearing operation sang City Legal Office enforcement team sa mga puluy-an nga apektado sang natalana nga demolisyon sa Barangay 12 sa likod sang Manokan Country sa reclamation area.