Na identify na sang Commission on Elections ang mga alternative polling centers kun sa diin maga boto ang mga pumuluyo sang Bago City, La Carlota City kag La Castellana nga apektado ukon nag evacuate bangud sang bulkan Kanlaon.
Suno kay Provincial Elections Supervisor, Ian Lee Ananoria sa Provincial Joint Security Control Center meeting sang nagligad nga semana na-finalize na nila ang ila nga mangin tikang karon nga indi naman gid tigayon pa anay maka balik sa ila nga mga balay ang mga evacuees.
May tatlo tubtob apat ka mga barangay sa La Castellana kag La Carlota suno kay Ananoria nga ang mga pumuluyo apektado bangud sang sitwasyon sang Kanlaon.
Mga isa tubtob duha naman ka mga barangay sa Bago ang apektado.
Kun wala naman sang eskwelahan nga available nga maga serbe polling center nga malapit sa kun diin naga tenir ang evacuees suno kay Ananoria, may makeshift nga polling center sila nga ipahamtang.
Dugang pa ni Ananoria ang COMELEC ang maga pahibalo nga daan sa mga apektado nga voters kun diin sila magaboto.