Bisan indi dungan nga ginpang wigit sa Uyot Bridge sa Sitio Lantawan sa Barangay Guimbalaon sa Silay City dako ang pagpati ni Silay City Police Chief, Lt. Col. Mark Anthony Darroca nga isa lang ka grupo ang may kahimuan sini.
Hulungdon ang magpadulong sa lugar, mga 20-30 minutos nga biyahe gikan sa Silay City proper kag madulom ang area.
May nakita man ang PNP nga pattern sa paghulog sang patay sa lugar. Disyembre 30 sang una madiskubrehan nga may nagaka agnas na nga bangkay nga ginhulog sa lugar.
Pag usisa sa lugar na diskubrehan man nga may mga tul-an pa gid sang duha ka mga tawo nga nasulod man sa sako nga ginwigit man didto.
Disyembre 26 may saksi nga naka kita nga may brown nga Innova nga nag dulog sa higad sang taytay kag naghulog sang sako.
May mga pamilya na nga nagpadulong sa PNP agud usisaon kun ila himata ang napatay pero negatibo.
Ang iban nabudlayan sa pagkilala ilabi na sa naha-una nga mga patay kay tul-an na lang ang nabilin. Ginpalubong na sang PNP ang bangkay kag mga tul-an.