Gina usisa pa kun pila ang balor sang mga ginkawat nga kwarta kag mga pagkabutang sang wala pa makilala nga mga persona nga nag ransack sa Gaisano Mall sa Barangay Palampas, San Carlos City sang kahapon.
Suno kay Lt. Col. Nazer Canja, hepe sang San Carlos City PNP, wala pa makumpleto sang SOCO ang ila gina himo nga inventory bangud gin una anay ang pagtipon sang mga ebidensya sa crime scene.
Dugang pa ni Canja, naga padayon pa man sa karon ang ila pag pangusisa kun diin gid nag agi ang mga kawatan.
Base sa CCTV footage nga ila nakuha gikan sa mall, duha ka mga persona ang nakit-an nga nag gwa sa gin kutkot nga buho nga naglapos sa isa ka botika.
Kahapon sang natukiban sang mga empleyado nga ginsulod ang amo nga mall bangud sa ila na diskubrehan nga pagka buka sang glass wall sang botika kag nahabukay na ang mga kagamitan sang mall pati na ang jewelry shop kag iban pa nga mga establisimiento komersyal sa lugar.
Ginhinyo man sang kapulisan ang bulig sang City Engineers Office agud sa pag usisa sang mga drainage system sa palibot sang Mall nga posible gin agyan sang mga responsable nga naghimo sang krimen.
Sang sini man nga bulan sang Agosto sang gin tuyo nga kawatan sang gina patihan katapo sang Termite Gang ang Metro Super Market sa Barangay Sum-ag sa Bacolod pinaagi man sa pag agi sa drainage kag pagkutkot sang duta sa idalom sang establisimento pero napaslawan sila kay nabatian sang mga gwardiya nga may naga paniltig sa idalom sang tiles.