Bangud sa nagluntad nga kinagamo sa gwa sang isa ka bar sa dalan Lacson sa Barangay Mandalagan sa Bacolod, nagresulta ini sa pagkapatay sang isa ka soltero.
Mayo 13 sang kaagahon, sang nagluntad ang komosyon nga nagresulta sa pagbuno sa 18 anyos nga soltero sa gwa sang restobar sa Mandalagan.
Sa imbestigasyon sang PNP, gikan ang biktima kag suspek sa restobar antes sila ang nagwa kag nagkinagamo.
Ginsiling ni Police Major Rondyl Tapang, hepe sang Station 3, nga sila ang magahinun-anon sa mga opisyales sang Mandalagan agud hibaluon kung ngaa nagbukas ang nasambit nga bar bisan nga las 11:59 Lunes sang gab-i lamang gin-lift ang liquor ban, Lunes man sang gab-i naka inum pa didto ang biktima kag suspek kag nagluntad ang insidente pagka kaagahon.
Sa karon, yara na sa kustodiya sang Police Station 3 ang suspek sa pagpangbuno matapos nagsungka Miyerkules sang hapon.
Ginahanda na sang kapulisan ang kaso nga homicide batuk sa suspek.