Pamunuan sang Bacolod City Police Office nagapangabay sa mga courier service sang maid-id nga pag-inspeksyon sang ginapadala nga packages sa Bacolod kasunod sang recovery sang kapin P6.8M nga suspected shabu.
Ginsiling ni BCPO Director Colonel Joeresty Coronica nga masami indi nila mapunggan ang nagasulod nga supply sang iligal nga droga ilabi na kun indi ini gikan kag sakop sang ila jurisdiction. Kasubong na lang kun posible sa pwerto kag airport ginapaagi ang mga ginakabig contraband.
Pero hugot nila nga gina-monitor ang pagsulod sang iligal nga droga ilabi na karon nga MassKara Festival resulta nga nakumpiskar ang kapin P6.8M sa joint anti illegal drug operation sa Barangay 12 kahapon. Ang kasubong sang nagligad nga iligal operation, nakumpiskar ang mga bulto sang suspected shabu nga nakaputos sa tea bag.
Nagapati si Coronica nga posible ginpaagi sa courier service ang supply sang iligal nga droga nga ginasiling gikan sa Manila. Gani nagpahanumdom ang pamunuan sang BCPO sa mga courier service nga dapat maid-id nga usisaon ang mga ginapadala nga packages agud mas mapabaskog ang kampanya kontra iligal nga droga sa siudad.