Gin-aprubahan sang Korte ang gin-file sang kapulisan nga search warrant to disclose computer data may angut sa kaso ni Freya Mae Go, nga nasapwan sa Reclamation Area, Barangay 12 sa Bacolod City sadtong Oktubre 22.
Ginsiling ni Police Captain Francis Depasucat, hepe sang Bacolod Station 1 nga ila na iga-serbe ang search warrant sa isa ka telecommunications company kag Meta platforms paagi sa Regional Anti-Cybercrime Unit sang Police Regional Office-Negros Island Region.
Ang kaundan sang nasambit nga search warrant amo ang mando sang korte sa telecom kag Meta platforms nga mag-issue sang data nga makabulig sa pagsolbar sa kaso nga pagpatay kay Go.
Sa karon, magahulat ang kapulisan sa resulta ukon datos gikan sa telecom kag Meta.
Suno kay Depasucat, isa ini ka pamaagi agud mahibaluan ang mga tawo nga ulihi na-contact ni Go antes siya ang nadula kag nasapwan nga patay sa Reclamation Area.
Makaligad ang duha ka bulan, wala sa gihapon sang suspek angut sa kamatayon ni Go. Isa sa mga kabudlayan sang kapulisan amo ang pagkuha sang mga footages sang CCTV halin sa mga business establishments.
Nagtanyag sang P100,000 nga reward ang city government sang Bacolod sa makahatag impormasyon agud makilal-an ang suspek, apang wala sang saksi nga nag-gwa kag nagpalapit sa pulis.
Base sa resulta sang autopsy, asphyxia due to strangulation ukon pagkuga ang gintunaan sang kamatayon sang 17-anyos nga si Go.*