Plastic waste pwede mahimu nga recycled hollow blocks nga sarang magamit sa housing project sang Bacolod.
Ginlunsar kahapon sang Barangay Taculing ang Material Recovery Facility Redemption Center nga amo ang sarang kadtuan sang mga pumuluyo agud mabayluhan sang grocery items ang ila mga recycled trash kasubong sang mga lata, karton kag mga plastic materials.
Sa pagpanguna ni Punong Barangay Lady Gles Gonzales-Pallen kabahin ini sang tikang agud ma-enganyo ang mga residente nga mag-segregate sang basura ilabi na ang mga plastic.
Sumugod sa Mayo 1 magalibot man ang IPM-CDC sa mga kabarangayan agud nga mahakot ang tanan nga mga plastic waste.
Suno kay Engr. Macky Maceda, Special Adviser for Waste Management sang siudad, ang mga plastic waste ang idul-ong sang garbage collector sa mga recycling plants agud nga mahimu sang mga bagay nga sarang mapuslan pa.
Nalakip sa mga recycling plants ang ginatukod karon sa Barangay Tangub nga sarang magmanufacture sang mga hollow blocks nga himu sa recycled plastic materials.
Ini ang ginalantaw sarang magamit sa housing project sang Benitez administration.