Sa post sang animal welfare group nga Pawssion Project ginpakita nila ang kahimtangan sang dog pound sang Bacolod. Naga ginutok ang mga ido kag wala na matinluan ang lugar.
Malawig na kuno nga makaluluoy ang kahimtangan sang sini nga pasilidad sa Brgy 35 sa Bacolod.
Madasig ginpasa-pasahan sa social media ang post. Gin petisyonan sang nagkalain-lain nga grupo ang pagdula sa dog pound kag pag kakas sa City Veterinarian sang siudad.
Kaina sa press conference ni Mayor Greg Gasataya, ginpakita niya ang proyekto sang lokal nga panguluhan para mapasangkad ang serbisyo kag pagtatap sa mga kasapatan sa siudad.
Magasapol siya sa mga animal welfare groups sa masunod nga mga inadlaw agud i-present ang plano kag batunon ang ila mga suhestyon parte sa pagdumala sang shelter.
Ang proyekto, nga iga pondohan sang kapin P10 milyon, para sa pagtukod sang bag-o kag mas kompleto nga animal shelter nga may kapasidad nga maka-accomodate sang 500 ka mga ido.
Magabutang man ang siudad sang bag-o nga assistant city veterinarian nga mas makahatag sang atensyon sa kasapatan sa dog pound.*