Plano sang probinsya nga pagsaylo sang administration center sa Talisay City ang nagapabilin. Pero kinahanglan anay ang paghilisugot sang contractor kag sang panguluhan probinsyal ang bahin diri.
Paathag ni Provincial Administrator Rayfrando Diaz, base sa abiso sang GPPB ukon government procurement policy board, tungod nga may pagbag-o sa plano sa na bid na nga proyekto – ang pagpatukod sang bag-o nga Provincial Administration Center, kinahanglan magpatigayon sang rebidding.
Luyag sang probinsya nga ang plano nga pagpatukod sang administration center sa Aguinaldo Street sa Bacolod City isaylo sa Talisay City kun sa diin mas may lugar kag daku ang madala nga kahigayunan sa negosyo kag ekonomiya.
Pero kay may kontrata na sa Dynamic Builders and Construction Co., Inc. nga amo ang nag daog sa bidding para sa halos isa ka bilyon ka pesos nga proyekto, kinahanglan anay ang pagsugot sini sa plano nga magsaylo, pagbalik sang advance payment nga 15 percent sa kantidad sang proyekto kag ang pag rebidding.
Kun indi magsugot magapabilin ang proyekto sa orihinal na plano suno kay Diaz. Dugang pa ni diaz kun matigayon ang rebidding mahimo nga may bag o nga disenyo. Posible nga sa masunod na nga termino matigayon ang proyekto.