Nagdangat na sa pito ang cholera cases sa Negros Occidental, kasunod sang duha pa gid ka bag-o nga kaso sa Silay City.
Suno kay Negros Occidental Governor Eugenio Jose Lacson, may isa nga nag positibo pa gid sa cholera sa Brgy E. Lopez kag isa pa gid nagdugang sa Guinhalaran.
Sa karon lima ang cholera cases sa Silay. Manubo man ini, pero kun indi gilayon nga ma aksyonan sarang nga mag lapta suno sa gobernador.
Suno sa siya naga patuman na sang nagakaigo nga tikang ang local government unit.
May isa man ka kaso sang cholera sa Victorias City kag EB Magalona. Suno kay Victorias Mayor Javier Miguel Benitez yara naman sang estable nga kahimtangan ang pasyente.
Ginsiling naman ni EB Magalona Mayor Marvin Malacon nga naka gwa na sa ospital ang pasyente. Siya ang natalana nga magsapol sa Local Drinking Water Committee sa Lunes bilang chairperson.
Magasapol man si Malacon sa mga owners kag operator sang water refilling stations sa banwa para masulit ang pahanumdom nga sila ang regular nga magpatuman sang bacteriological water testing.
Gina sulit man ni governor Lacson ang pahanumdom sa mga LGU sa probinsya nga magpatuman sang inspection sa mga water sources nila kasubong man sa mga water refilling station para mapasiguro nga matinlo ang tubig nga gina gamit kag gina inom.
Napadala naman sang Provincial Health Office ang mga water sample gikan sa mga barangay nga may cholera case sa Research Institute for Tropical Medicine para sa laboratory testing.