Setyembre sang nagligad nga tuig sang ginsuguran sang Bacolod Bulk Water Inc. ukon BBWI ang pipelaying project para sa dugang nga 10 million liters a day (MLD) nga water supply agreement upod sa Baciwa-Primewater.
Hunyo sang nagligad nga tuig sang natigayon ang kasugtanan paagi kay Mayor Albee Benitez nga sadto anay nagpatigayon sang water summit agud masolusyunan ang problema sa kakulang sang water suppy sa siudad.
Ang pipelaying project ang maga-angut sa Injection point 2 sang BBWI sa Sum-ag River sa Barangay Salvacion sa banwa sang Murcia.
Ginapaabot ni Baciwa General Manager Mona Dia Jardin nga matapos ang proyekto sini nga Enero agud nga mapalab-ot ang dugang nga water supply sa kapin 10,000 ka mga panimalay sa Barangay Mansilingan, Handumanan, Felisa, Alijis, Tangub, Taculing, Pahanocoy, Sum-ag kag Singcang-Airport sa madasun nga tuig.
Upod sa Bacolod LGU, tuyo sang Baciwa-Primewater kag BBWI nga malab-ot ang kabilugan nga 25MLD nga water supply para matigayon ang 24/7 nga supply sang tubig sa siudad sa 2026.