Hospital Operations Head, Dr. Girlie Pinongan ang gin-designate bilang OIC-Provincial Health Officer sang Negros Occidental.
Sumugod Abril 3, si Dr Pinongan ang magapungko bilang OIC-PHO kasunod man sang pagsugod sang transition dala sang ginapaabot nga retirement ni Dr Ernell Tumimbang sa Hunyo.
Sa order ni Governor Eugenio Jose Lacson ini ang dugang niya nga responsibilidad samtang sya ang padayon nga naga pamuno man sang HOD.
Suno kay Provincial Administrator, Rayfrando Diaz, isa sa direksyon karon sang probinsya amo nga mapangapinana ang public health agud to malikawan ang ano man nga balatian kag mapaiway ang pagsaka sang hospitalization cases.
Suno kay Diaz, bilang HOD head mas may ihibalo na si Pinongan bahin sa hospital operations bagay nga dapat mag-santo sa pagsabat sang public health concerns nga yara naman sa idalom sang PHO.
Nalakip man sa tutukan ang nutrition concerns sang probinsya labi na sa pila ka mga barangay nga may kasubong nga mga kaso.
Samtang, sa tion nga mangin effective na ang retirement ni Tumimbang, mangin bukas ang position sa sin-o man nga interesado kag qualified suno kay Diaz.
Pero ang desisyon sa pagpili ang yara na kay Governor Lacson.