Pa tambay tambay lang sang una.. Pa Mobile Legends lang ukon ML… Pero matapos matagaan sang oportunidad sang ila kaupod sa simbahan nga mag trabaho samtang naga eskwela.
Naglain ang lakat sang pangabuhi sang mag abyan nga Francisco Mejorada kag Christian Allaine Del Rosario.
Si Francsico, 21 anyos kag 2nd year student sang TUP Visayas. Si Christian naman 18 anyos kag 1st year college sang Colegio San Agustin Bacolod.
Mga empleyado sila sang Daygon Cafe nga ang original nga branch yara sa St. Francis Subdivision sa Barangay Taculing. Sila naman nga duha na assign sa pop up market sa likod sang Bacolod City Government Center.
Ang tanan nagsugod sa pag inupdanay nila sa ila nga simbahan.
Dako kuno ini nga bulig sa ila nga mga estudyante kay gintun-an nila kun paano mag timpla sang nanari sari nga mga ilimnon. Halin sa kape pakadto sa mga non coffee drinks, lemonade kag soda.
Natun-an man nila ang importansya sang kwarta sang naga trabaho na sila pero dapat indi mag untat sa pag eskwela.
Bangud sang oportunidad nga gina hatag sa ila bilang mga estudyante pa lang, aminado sila nga dako gid ang ginbag-o sa ila nga pagpanggawi.
Para sa ila, ini ang training pa lang para sa mas masanag nga palaabuton. Basi pa lang pila ka adlaw makapatukod man sila sang ila man kaugalingon nga kapehan!