Sugar Order number 2 ang gin pa gwa na sang Sugar Regulatory Administration nga naga tugot sang pag-import sang 150,000 metric tons sang refined sugar.
Nakasaad sa amo nga sugar order nga katunga sini ukon 75,000 metric tons ang para sa industrial users nga naga lakip sang food, confectionaries, biscuits, bread, candies, milk, juice kag beverage manufacturers nga naga baligya sang ila nga mga finished product sa domestic market.
Ang nabilin naman nga katunga ang para sa consumers.
Sang Martes naman sang gin pa gwa sang SRA ang Sugar Order Number 1 nga naga mando sang classification sang bilog nga sugar production sang pungsod sa 2022-2023 bilang “B” para ibaligya sa domestic market.
Suno kay SRA Administrator David Alba, 100 percent nga “B” ang allocation base sa projected production nga mas manubo sang sa demand sa karon.
Gani para man masabat ang gina siling tightness sa sugar supply nag pasar ang SRA Board sang importation program nga maga serbe sang industrial users kag sang mga consumers.
Ang pag import suno kay Alba stopgap measure lamang bangud gina lauman ang pag abot sang supply karon nga amat amat na ang pag galing.
Padayon naman ang monitoring sa supply kag demand suno kay Alba para makapatuman ang SRA sang naga kaigo nga tikang.