Pila ka mga lideres sang Kapatiran ukon sadto anay mga katapo sang RPA-ABB ang sa karon nag-alegar nga gina casing ukon gina monitor sang special partisan unit ukon sparu sang rebeldeng CPP-NPA.
Ini suno kay Veronica Tabara nga lider sang Kapatiran kag karon naga pungko man bilang co-chair sang Joint Enforcement Monitoring Committee ukon JEMC.
Suno kay Tabara sini lamang pila ka lideres nila ang naka eksperiensya sini kag sa ila nga bahin sila ang labing naga halong kag naga pangayo sila sang pag pangapin.
“Gapangayo man kami sa gobyerno nga mabuligan kami nga mapangapinan kami. Kun maka igo sila te mahambal sila ang peace na indi na ma sustenir”, suno kay Tabara.
Sa record sang Kapatiran may 13 sa ila nga mga katapo ang ginpamatay humalin sang natigayon ang peace process.
Suno kay Alan Gozon nga presidente sang Democratic Alliance of Labor Organization ukon DALO kasubong man Secretary General sang Kapatiran, may pila man ka adlaw nga may impormasyon kag na monitor sila nga gina patihan katapo sang NPA nga yara ang presensiya sa palibot lamang sang iya nga balay.
Ang pinaka ulihi kaina sang aga, wala labot diri ang na-monitor man nila sang Lunes kag Martes kun sa diin may duha tubtob tatlo kag apat ka grupo-grupo ang ila nga nakit-an.
Na capture man in isa CCTV. Gina kabig niya nga siya ang isa ka fixed target.
Indi man gani siya combatant rason nga wala sang basehan para sa amo nga propaganda sang mga suspected NPA suno sa iya.
“Indi man ko anti-people. Gin pa record na namon… Kun amo gid man na ang ila nga tuyo nga asasinahon ako, te naga pabalo lang ko nga indi siya mayo nga propaganda”, suno kay Gozon.
Ginsakdag sini nga adlaw ang Provincial Peace and Order Site Coordinating Team Meeting nga gin pamunuan ni Governor Eugenio Jose Lacson. Kabahin ini para malambot ang katumanan sang bilog nga peace process.
“We are working on the final peace resolution with the Kapatiran”, suno kay Lacson.
Nalakip man diri ang padayon nga proyekto para sa 727 ka mga na profile nga katapo sang Kapatiran. Ang Negros Occidental nakahatag sang livelihood, scholarship, lakip na health programs para sa grupo.