Nakibot ang tag-iya sang Toyota Hilux nga pickup truck matapos madiskubrehan nga napuno sang kurit ang lawas kag suga sang ila salakyan nga gin-park sa dalan sa kilid sang Bureau of Internal Revenue sa Barangay Taculing, syudad sang Bacolod.
Ginsiling sang tag-iya nga si alyas “Em”, taga-Bago City, wala pa 30 minutos nga ila gin-park ang salakyan agud magkadto sa opisina sang isa ka abogado, sang sila ang nagbalik kag nakit-an ang madamo nga scratches sa palibot sang salakyan.
Layo sa gate sang isa ka balay ang area kung diin gin-park ang pickup, suno sa car owner.
Sa pagpang-usisa sang tag-iya ka pickup, may nakakita nga isa ka babaye, ginabulubanta naga-edad 40 tubtob 50 anyos, ang nagkurit sa salakyan. Suno sa mga saksi, nagasinggitan ang babaye samtang ginakuritan ang pickup.
Nagpa-record na ang tag-iya sang salakyan sa Police Station 6.
Sa quotation sang isa ka auto repair shop nga ginkadtuan sang tag-iya, yara sa P67,000 ang estimated nga balayran sa pagpa-repair sang damage sa bilog nga lawas sang pickup, pati na ang mga suga sini.
Sa post sang tag-iya sang pickup sa Facebook angot sa insidente, may isa man ka car owner ang nagsiling nga siya ang naka-eksperyensya sang kasubong nga hitabo sa kapareho nga lugar.
Suno kay alyas “San”, isa pa lang ka semana ang iya brand new nga salakyan sang siya ang nag-park sa kapareho nga lugar kag ginkuritan man sang tuig 2024. Yara sa P12,000 ang quotation sa iya agud makay-o ang mga kuris.*
[sibwp_form id=1]