Wasak ang atubang sang pick up truck samtang nagkulob ang armored vehicle sa katubuhan matapos ini sila nagbungguanay sa Hacienda Paco, Barangay Aguisan sa Himamaylan City, pasado las 11 kaina sang aga.
Sakay sang pick up ang 36-anyos nga driver, ang iya 25-anyos nga live-in partner kag ila isa ka tuig nga baby.
Samtang lima ang sakay sang armored vehicle – isa ka driver, tatlo ka security guard kag isa ka bank teller.
Ginsiling ni Police Lt. Peter Genovia, deputy chief sang Himamaylan PNP, gindala sa ospital ang isa ka security guard kag ang driver sang armored car, nga isa man ka security guard. Outpatient naman ang mga sakay sang pickup truck, tanan residente sang Brgy. Aguisan.
Nag-gwa sa imbestigasyon sang Himamaylan PNP, padulong Binalbagan ang pickup truck samtang pakadto Kabankalan ang armored vehicle.
Nahulog ang karga nga bangko sang Ford Ranger, rason nga ginbalikan ini sang driver. Sa pagliko sang pickup, didto na kag na-alang-alang man ang armored car kag nagbungguanay sila.
Ang pilason nga driver sang armored vehicle, naga-edad 47-anyos, taga Talisay City, samtang ang isa ka security guard nga pilason ang naga-edad 27 kag residente sang Pulupandan.*
[sibwp_form id=1]