May posibilidad nga mag phreatic eruption nga matabo sa bulkan Kanlaon. Ini suno sa kay Mari-Andylene Quintia, resident volcanologist sang Philippine Institute of Volcanology and Seismology ukon Phivolcs nga naka base sa La Carlota City.
May 17 ka mga pagtay-og sa sulod sang bulkan sa sulod sang 24 oras sandig sa monitoring sang Phivolcs kag iban diri malapit sa crater.
Dugang pa niya nagapakita sang sinyales nga na “stress” ang bulkan kag wala man maka pagwa sang steam kag mainulananon pa gid ang panahon, mga sinyales nga posible matabo ang phreatic eruption.
“Pwede ni siya nga sign nga medyo na stress kung baga kay indi siya kapasungaw kay usually may ga gwa nga steam sa Kanlaon di ba? So sa subong maulanon, kung baga recipe siya for a phreatic eruption” suno sa kay Quintia.
Ang phreatic eruption ang pagbuga sang steam sang bulkan.
Dugang pa ni Quintia, wala sang dapat kakulbaan ang publiko pero dapat nga estrikto nga gina sunod ang 4 kilometer permanent danger zone, kag wala man gina pahanugotan ang ano man nga aircraft nga mag labay malapit sa crater sang bulkan.
Ang Kanlaon Volcano ang nagapabilin sa gihapon sa Alert Level 1.