Halos 17,000 na sa karon ang yara sa mga evacuation center sa Himamaylan City.
Sa datus sang Provincial Social Welfare and Development Office as of 12nn subong nga adlaw,
Oktubre 11, 3,650 ka mga pamilya ang nag-evacuate ukon 16,976 ka mga persona.
Suno kay Provincial Administrator Rayfrando Diaz, nagpadala na ang Provincial Health Office sang
mga duktor sini agudto magbulig sa pag check-up para mapasiguro nga mapaiway ang paglapta
sang ano man nga posible masakit.
Damlag pa sa post ni Himamaylan Mayor Raymund Tongson may napanagtag naman nga mga bulong sa mga apektado nga pumuluyo. Dugang pa ni Diaz, ila man ginapasiguro nga safe ang water sources.
Bisan yara sa evacuation center indi lamang ginhatagan sang kaliwangan ang mga kabataan kundi padayon man ang ila nga pagtuon.
Tayuyon man ang pag abot sang relief assistance gikan sa nagkalain lain nga sector.
Suno kay Diaz may nagakaigo nga assistance ang probinsya. Kahapon nag deklara ang siudad sang state of calamity kasunod sang asud-asud nga engkwentro sa tunga sang militar kag rebeldeng NPA nga nag-apekto sang linibo ka pumuluyo.
Ang pag paidalom sa state of calamity naga tugot sa pag gamit sang siudad sang Quick Response Fund kasubong man pag release sang national calamity fund gikan sa nagkalain lain nga mga ahensya nga may kabahin sa relief operation.