Provincial Health Office ang naga haylo sa publiko nga magpaidalom sa booster shot.
Paathag ni Dr Ernell Tumimbang, maayo man nga nabakunahan na sang duha ka shot sang Covid – 19, pero kinahanglan nga pabakuron pa gid ang antibodies bilang pagpanghanda sa ano man nga variant naman nga maga sulod, kag ini paagi sa pag paidalom sa booster shots.
Gin-ako man ni Tumimbang nga manubo na gid ang takers ukon ang luyag nga mag pabakuna sa karon nga tion. Bisan gani naga house to house na sila para sa pagpabakuna mahinay sa gihapon.
Sa mga nabukid nga bahin isa man sa ila nga nasugata amo ang pagpanghangkat bahin sa insurgency.
Sa pihak nga bahin, suno kay Tumimbang, may verbal instruction na gikan sa Department of Health nga sarang magbukas sang vial sang bakuna bisan pa nga diutay lang ang mga persona nga maga gamit sini.
Ehemplo kun ang vial sarang magamit para sa anum ka persona, pero duha lamang ang maga pabakuna, iga accommodate ini suno sa doh. Ang dose nga indi na magamit kay tungod nga wala na sang maga pabakuna ang makabig na nga operational waste.
Paathag ni Tumimbang mas maayo na lamang ini sang sa ang bilog nga bakuna ang mausik labi na nga tuman ka damo sang bakuna karon kag manubo ang takers. May 221,049 ka Covid – 19 vaccines sa Negros Occidental ang maga expire sa April 30.