Magaresume na ang klase kasubong man trabaho sa government offices sa La Carlota City bwas, Hwebes.
Samtang, magapatigayon sang medical mission ang Provincial Health Office sa mga komunidad nga apektado sang heavy ash fall.
Gin-announce ni Mayor Rex Jalando-on ang pag lift sang suspension sang klase sa tanan nga level sa La Carlota, magluwas na lamang sa mga eskwelahan nga yara sa Ara-al, San Miguel, La Granja, Yubo, Hahiguimit kag Nagasi.
Yara naman sa otoridad sang school heads ang pag suspend sang klase kun kinahanglanon.
Samtang ginsiling ni Irene Bel Plotena ang pamuno sang Provincial DRRMO, nga target sang medical mission sa Hwebes ang mga pumuluyo nga yadtong sagwa sa evacuation center kag yara sa mga lugar nga natup-an sang abo.
Wala labot sa facemask nga ginpadala nila para dugang nga bulig sa mga apektado nakahatag naman sang bulong ang PHO angut sa mga respiratory related diseases.
Pero agudto nga mapasiguro man ang ikaayong lawas, isa ka medical mission ang gin-schedule.
Indi lamang ang mga pumuluyo ang gina tutukan kundi pati man ang mga kasapatan.
Sa La Castellana suno kay Plotena, gin-check naman ang mga kasapatan nga yara sa evacuation center, ginpatuman man ang inventory.
Nag-release naman sang vitamin supplementation.
Ang mga nag eksperiensya sang light ashfall suno kay plotena manageable na ang sitwasyon karon. Pero may mga napanimahuan pa nga asupre sa pila sa sining mga lugar.