Wala pa natapos ang away sang mga oppositor nga may kaangtanan sa Grupo Progreso nga mabalabagan ang pagsaylo sang voters registration ni anay congressman Albee Benitez sa Bacolod.
Ini bisan pa gin-deny na sang election registration board ang petition nanday Hector Yula, Teodoro Abao kag Jonah Abao batuk sa kongresista sang Hulyo 28, kahapon sila ang nagfile sang petition
for exclusion kontra kay Benitez sa Municipal Trial Court sa Bacolod.
Suno kay Atty. Andrei Saril, abugado ni Benitez, nakahanda sila gihapon nga sabton ang reklamu bisan pa may panibag-o nga witnesses nga gindugang ang mga petitioner.
Sanday Uula nga isa ka tricycle driver, kag ang mga mag-tiyo nga Abao nga suno sa ila mga abugado may kaangtanan sa Grupo Progreso ang nagapati nga si Benitez ang indi residente sang Mountain View Subdivision sa Barangay Mandalagan.
Pero para sa anay kongresista, tuyo lang sang mga petitioners nga kuhaan sang choice ang Bacolodnon para sa natalana nga 2022 mayoralty elections.
Si Benitez ang nagpahayag na sang iya plano nga magpapili bilang mayor sang Bacolod.
Si Benitez ang natalana maga-engkwentro kay incumbent Mayor Evelio Leonardia nga amo ang nagapamuno sang Grupo Progreso.
Makapila ka beses gin tinghuaan sang Digicast Negros nga kuhaan sang ila nga pahayag ang abugado sang petitioners pero wala sila naga sabat sa mga tawag.