Nakapangita sang balay si Mayor Albee Benitez nga maga serbe nga halfway house para sa mga pasyente kag watchers sang Corazon Locsin Montelibano Memorial Regional Hospital.May plano man ang siudad nga magtukod sang permanente nga shelter para sa ila.
Suno kay Mayor Albee Benitez, ang halfway house ang gina-amat amatan na kaayo para masayluhan sang mga pasyente kag watchers nga nagapabilin sa temporary shelter sang Barangay 18.
Pero magluwas sa halfway house, may plano man ang siudad nga magtukod sang mangin permanente na nga shelter para sa mga pasyente kag watchers sang regional hospital sa amo man nga barangay.
Suno kay Councilor Claudio Puentevella, pamuno sang Committee on Health sang konseho, nakig-sugilanon na siya sa isa ka property owner may angut sa ginadihon nga plano.
Kalabanan sa mga pasyente kag watchers ang indi taga Bacolod. Kada adlaw nagalab-ot sila sa kwarenta ka mga indibidwal nga naga pasilong sa natukod nga temporary shelter sa bulig sang mga grupo sang mga negosyante kag opisyales sang Barangay 18.
Pero ginademolish na ang amo nga shelter para man magamit sang tag-iya sang propiedad.
Samtang, ginsiling naman ni Governor Eugenio Jose Lacson nga sa karon ginatagaan naman atensyon sang provincial government ang mga watchers kag pasyente sang provincial hospital sa Silay City.
Tag-isa lang man ka watcher nga may negative result sa swab test ang ginatugutan sang pamunuan sang Teresita Jalandoni Provincial Hospital nga mag-tinir bara bantayan ang ila na-admit nga pasyente.
Ang provincial government ang nagbutang man sang mga tent para sa mga watchers nga sarang makatinir sa sulod sang hospital compound.