May mga adlaw nga naga dagsa ang mga amo sa highway sang Sitio Pataan sa Barangay Mailum sa Bago City.
Suno sa mga residente nakibot na lang sila nga may kapin sa kwarenta ka mga amo ang naga balik balik sa sini nga taytay.
Agud indi magtinir sa lugar kag maka balik sa ila nga habitat, nagbutang ang tourism office sang bago sang signage nga indi pwede pagkapyutan, pakan-on kag piktyuran nga may flash ang mga amo.
Suno sa kay PENRO Joan Nathaniel Gerangaya, masami naga biya ang mga amo sa ila nga habitat kun may naga sabad ukon may naga pahog sila. Gani iya nga ipausisa kun ano ang rason sa hinali nga pag panaog nila.
Ang tourism office naman sang Bago naga siling nga indi nila luyag nga himuon ini nga sanctuary kag gusto nila nga mag balik ang mga amo kun diin sila naghalin kay delikado kun mag istar sila sa higad sang karsada.
Sa impormasyon nga ila nakuha nagsugod pakita ang mga amo sa amo nga lugar matapos mag igo ang bagyo nga Odette sang bulan sang Disyembre 2021.