Mga pending nga business application sang commercial establishment sa siudad usisaon sang City Legal Office.
Humalin sang natapos ang Business -One-Stop-Shop sang nagligad nga Pebrero, nagsugod na sa pagpatuman sang mapping operation ang Business Permits and Licensing Office sa mga commercial establishment sa siudad. Ini agud masiguro nga lehitimo ang ila pag-operate sang negosyo.
Pero indi gihapon malipod nga may pila ka mga establishment ang wala na nag-proseso sa pagkuha sang permit nalakip diri ang resto bar sa dalan Lacson nga boluntaryo nga nanirado.
Ang Barangay Mandalagan ang nag-recommend nga mapasira ang bar matapos ang natabo nga rambol sang mga pamatan-on nga nagresulta sa kamatayon sang isa ka 18 anyos sang nagligad nga semana.
Si City Legal Officer Karol Joseph Chiu nag-coordinate na sa BPLO agud nga ma-usisa sang CLO Integrated Task Force ang mga commercial establishment nga may pending business application.
Nagpangabay siya sa mga negosyante nga tinguhaan nga mag-comply kag mag-secure sang kinahanglan nga business permit agud mapaiway ang posible nga pagpasira sang ila negosyo.