Naabtan sang pulis nga nagahigda kag may igo sang bala sa ulo ang 30-anyos nga pedicab driver sa San Juan Tunga, Barangay 5 sa syudad sang San Carlos, Negros Occidental, Miyerkules sang gab-i, Hulyo 30.
Base sa imbestigasyon, nagatindog sa gwa sang iya balay ang biktima nga ginkilala kay alyas “Erick” sang siya ang gintiro sang makapila ka beses sang suspek, rason sang iya kamatayon.
Ginsiling ni Captain Rodney Sarona, deputy chief sang San Carlos PNP, nadakpan sa hot-pursuit operation ang suspek nga ginkilala kay alyas “Leo”, 27-anyos, residente sang Barangay Prosperidad sa San Carlos.
Nakuhaan ang suspek sang isa ka caliber .45 nga pusil.
Suno kay Sarona, isa si “Leo” sa duha tubtob tatlo ka mga suspek nga ginalantaw sang kapulisan nga responsable sa krimen.
Sa pahayag sang suspek sa kapulisan, iya gintiro ang biktima bangud may personal nga atraso ini sa iya.
Ginpaidalum ang nadakpan nga suspek sa paraffin test sa Provincial Crime Laboratory sa Bacolod City agud mahibaluan kung siya ang nakapalupok sang pusil. Samtang ang na-recover nga armas luthang ang gindala sa Negros Occidental Police Firearms Unit para sa ballistic examination.
Suno sa background investigation sang kapulisan, gikan ang biktima sa Manila kag nagbalik lang sa San Carlos, apang ang suspek ang may record nga imbulbado siya sa isa ka shooting incident sa San Carlos sadtong tinalikdan nga tuig.
