Kaupod sang mabaskog nga drum beats, mabaskog man ang panawagan sang Philippine Dental health Association Negros Occidental chapter sa publiko nga likawan ang peke nga mga dentista kag ang maayo nga oral hygiene ilabi na karon sa panahon sang pandemic.
Suno sa kay Dr. Janice Ianne Iran Bancaya, presidente sang Philippine Dental Health Association Negros Occidental chapter, siguraduhon nga lisensyado ang gina kadtuan nga denstista bangud may mga health protocols nga dapat gina sunod karon sa panahon sang pandemic.
Indi kuno dapat pag isalig ang baba sa kun kay sino lang.
Kalabanan kuno sa mga peke nga mga dentista ang naga panukot sang barato kun ikumpara sa lisensyado nga dentists pero delikado ang ila nga gina himo kag masami ang mga naga lala nga mga kaso gina salo na sang mga licensed dentists.
Ang mas kakulbaan pa gid suno sa grupo kay may mga kaso kun sa diin may persona nga nagakapatay bangud sa indi amo nga proseso nga ginahimo sang indi lisensyado nga dentista.
Suno sa incoming presidente sang group nga si Dr. Candylou Robles Iligan kag chairman sang 17th National Dental Health Month, indi dapat pagpabay-an ang oral hygiene bisan pa naga mask kun naga gwa sa balay.
Kaina may gin unveil ang grupo nga tarpaulin sa Bacolod City Government Center kag sa Corazon Locsin Montelibano Memorial Regional Hospital bilang pahanumdom sa publiko sa kampanya kontra iligal nga pag practice sang unlicensed dentists kag para sa oral hygiene.
Nag libot sila sa mayor nga dalanon sang Bacolod bilang panugod sang National Dental Health Month.